Ish deputetja e PD, Rudina Hajdari ka folur mbi gjendjen aktuale brenda partisë Demokratike ku ndër të tjera ka përcaktuar gabimet strategjike të bëra nga ish kryedemokrati Basha.
Hajdari e ftuar në një emision televiziv, tha se nëse Basha nuk do kishte hequr dorë nga mandatet në vitin 2019 dhe nuk do të kishte bojkotuar zgjedhjet lokale të atij viti, sot PD do të ishte në pushtet.
Gjithashtu ish deputetja shtoi se zgjedhjet lokale të 6 marsit, vërtetuan se ish kryeministri Sali Berisha ende kishte një mbështetje të madhe brenda partisë Demokratike.
Hajdari: PD po ripërtërihet por e gjithë pesha për këtë proces duhet të jetë tek anëtarësia sepse ata janë larguar së fundmi sepse kontributi i tyre nuk është shpërblyer. Janë marrë dy vendime si lënia e mandatit dhe bojkotimi i zgjedhjeve lokale të 2019 të cilat ndikuan shumë në këtë gjendje. Nëse nuk do ishin marrë këto dy vendime sot PD do ishte në pushtet. Nga pikëpamja strategjike këto ishin gabimet e Bashës por më pas ishin edhe gabimet e brendshme në PD.
Unë mendoj se ndryshime të dobishme kanë qenë ato që janë ndërmarrë në Kuvendin e 11 dhjetorit, ku është zvogëluar pushteti i kryetarit siç mund të përmendim votëbesimin nëse do të ketë humbje të zgjedhjeve. Basha nuk e bëri këtë. Tashmë duhet të lëmë pas të kaluarën e lidershipit të Bashës dhe të ecim përpara me një lidership të ri të cilët do jenë të votuar nga anëtarësia.
Pyetje: Keni qenë kritike e Berishës duke e fajësuar për emërimin e Bashës, ka ndryshuar qëndrimi juaj apo Berisha?
Hajdari: Unë isha kritike ndaj Berishës sepse gjatë viteve që Basha ishte kryetar për 9 vite, ai nuk ngriti njëherë gishtin për shumë vendime të gabuara që i ndërmori. Mendoj se ata të dy ndajnë përgjegjësi në këtë proces, por në fund të ditës është në dorë të anëtarësisë. Zgjedhjet e 6 marsit konfirmuan se Berisha ende ka një mbështetje brenda PD-së dhe kjo është e pamohueshme. Basha e degradoi partinë deri në atë pikë sa në zgjedhjet e 6 marsit doli forcë e tretë.
