Deklarata pak ditë më parë e kreut të Programit të Ushqimit të OKB-së David Beasley se 2% e pasurisë së Elon Musk mund të zgjidhë problemin e urisë në botë vijon që të sjellë replika. Elon Musk sfidoi OKB-në duke i kërkuar që të provojë që 6 miliardë USD zgjidhin problemin me urinë në botë dhe atëherë ai premtoi se do të shiste menjëherë aksionet e Tesla-s.
Sot ishte investitori Ross Gerber që u përfshi në debatin që ka plasur në rrjet. “A i ka dërguar dikush @elonmusk një plan të detajuar për të zgjidhur urinë në botë. Duket si një mundësi e humbur…”, thotë Gerber. “Ende jo. Ata thjesht duhet të postojnë librin e transaksioneve.
Duhet të jetë diku” ishte përgjigja e Elon Musk. Nuk mungoi replika e shefit të Programit të Ushqimit të OKB-së, David Beasley, i cili shkroi në Twitter “Plani mund të jetë në pak ditë. Së shpejti do të vendosim duke dhënë një pasqyrë të gjerë. Detajet do të vijnë”.
Por si nisi?
“Unë jam gati të zhduk urinë në botë dhe të shpëtoj 42 milionë njerëz në rrezik të urisë nëse vërtet mund të më vërtetoni se kjo mund të bëhet me 6 miliardë dollarë.” Kjo ishte në thelb përgjigja e Elon Musk, themeluesit të industrisë së automjeteve elektrike Tesla, ndaj kreut të programit ushqimor të Kombeve të Bashkuara, David Beasley.
Musk “i ngriti dorezën” në sfidë Beasley-t, i cili në një intervistë të fundit për CNN tha se dy njerëzit më të pasur në botë, themeluesit dhe krerët e Tesla dhe Amazon, përkatësisht Elon Musk dhe Jeff Bezos mund të zgjidhin problemin global të urisë duke ofruar vetëm një pjesë të vogël të pasurisë së tyre personale.
Duke përsëritur thirrjen e tij për miliarderët e botës përmes Twitter, Beasley theksoi se “vetëm 6 miliardë dollarë mund të parandalojnë vdekjen e 42 milionë njerëzve në rrezik nga uria“. Ai iu drejtua Muskut duke kërkuar ndihmë dhe theksoi se problemi i urisë globale mund të zgjidhet me 2% të pasurisë së tij.
Elon Musk, nga ana tjetër, nxitoi të sfidonte David Beasley për prova për t’iu përgjigjur ankesës. “Nëse programi ushqimor i OKB-së mund të më përshkruajë saktësisht se si 6 miliardë dollarët mund të trajtojnë urinë globale, unë do të shes menjëherë aksionet e Tesla-s dhe do ta bëj këtë”, shkroi ai në llogarinë e tij në Twitter.
Megjithatë, ai shtoi se shpjegimi duhet të jetë i hapur për publikun, në mënyrë që njerëzit të shohin se si do të shpenzohen paratë. Duhet theksuar se 6 miliardë dollarët në fjalë janë me të vërtetë një pjesë e vogël e pasurisë personale të Elon Musk, e cila aktualisht është 311 miliardë dollarë. Përveç kësaj, Musk fitoi më shumë se 6 miliardë dollarë në një ditë, 9.3 miliardë dollarë iu shtuan pasurisë së tij më 29 tetor./abcnews
