Personat e pavaksinuar në Greqi do të lejohen të hyjnë në zyrat e qeverisjes vendore, banka, dyqane dhe parukeri vetëm me një test negativ për COVID-19, duke filluar nga e shtuna. Gjithashtu, ata do të duhet të paraqesin një test negativ në punë dy herë në javë dhe me shpenzimet e tyre. “Dyqanet thelbësore, si supermarketet dhe farmacitë, do të mbeten të aksesueshme pa teste”, tha ministri grek i Shëndetësisë, Thanos Plevris.
Sipas ministrit, nga dita e premte e tutje të gjithë qytetarët e moshës 18 vjeç e lart do të mund të marrin një vaksinë përforcuese. Plevris shpjegoi masat e reja duke thënë se qytetarët e pavaksinuar janë më të ndjeshëm ndaj infeksionit me COVID-19 dhe për këtë arsye duhet të bëjnë më shumë kujdes. “Nuk është e mundur të vendoset sërish një bllokim mbarëkombëtar”, theksoi ai.
Në Greqi, numri i infeksioneve të reja ditore është rritur ndjeshëm kohët e fundit. Të martën u raportuan 6 700 raste të reja, një rekord që nga fillimi i pandemisë. Pothuajse 90 për qind e shtretërve të kujdesit intensiv COVID-19 janë të zëna, me 85 për qind të këtyre pacientëve të pavaksinuar.
