Turistët polakë që po fluturojnë drejt Shqipërisë me chartera që prej mesit të majit përbëjnë grupin kryesor të turizmit të organizuar që po frekuenton bregdetin shqiptar.

Por një vendim i fundit që po diskutohet në qeverinë polake mund të penalizojë ata që duan të vizitojnë Shqipërinë. Përfaqësues të kompanive polake në Shqipërinë thanë për “Monitor” se kjo nuk është diçka që lidhet me Shqipërinë në mënyrë të drejtpërdrejtë por se e cenon atë nëse do të vihet në jetë.

“Vendimi për momentin ende nuk është miratuar dhe mbetet pezull. Ky vendim parashikon 10 ditë karantinë nëse kthehesh në Poloni nga një vend që nuk është pjesë e Shengen. Bëhet fjalë gjithmonë për njerëzit që ende nuk janë vaksinuar. Gjithsesi vendimi parashikon që nëse po këta individë kryejnë një test për COVID pas 7 ditësh në karantinë dhe ai rezulton negativ atëherë nuk ka nevojë që të vijojë të mbahet karantina” thanë këta përfaqësues.

Vendimi i qeverisë polake nisi të diskutohet si efekt i rritjes së rasteve të atyre që kanë rezultuar të infektuar me variantin Delta të virusit. Nga Ministria e Shëndetësisë në këtë vend u konfirmua se rastet me këtë variant ende nuk ishin të shumta por vendosja e këtyre masave bëhet për të mos pasur rritje të shpejtë.

Përmasat e ndikimit të këtij vendimi të qeverisë polake që ende s’ka hyrë në fuqi mbeten të paqarta edhe për vetë operatorët shqiptarë pasi aktualisht sezoni turistik është në vazhdim dhe rezervimet janë kryer ndërkohë që mund të ndikojë si frenues për ata që ende nuk e kanë kryer një të tillë. Përfaqësues të strukturave hoteliere në vend thanë se kjo sigurisht nuk do t’i shërbejë pozitivisht turizmit vendas. Në një rast si ky sipas turoperatorëve shqiptarë duhet të jetë qeveria e cila duhet të lobojë për të krijuar akses që Shqipëria e cila aktualisht ka një risk të ulët për përhapjen e COVID-19 të trajtohet më vete me një marrëveshje.

Të dhënat e fundit për lëvizjen e shtetasve në vend tregojnë se në janar-mars një ndër vendet me hyrjet më të larta, ishte Polonia 4,5 herë më shumë se në të njëjtën periudhë të një viti më parë. Vetëm në maj në vendin tonë kanë hyrë 4.701 shtetas polakë ndërkohë që turoperatorët kanë konfirmuar se minimalisht janë mbi 20 chartera në javë që vijnë për turizëm të organizuar të përqendruar kryesisht në Durrës./Monitor/